रियाद । यमनका हुथी विद्रोहीहरूले साउदी अरबमाथि आक्रमण तीव्र पारेपछि साउदी नेतृत्वको गठबन्धनले शनिबार दुई ड्रोन र दुईवटा ब्यालेस्टिक क्षेप्यास्त्र रोकिएको दाबी गरेको छ। हुथी समूहले राजधानी रियादसहित विभिन्न क्षेत्रमा आक्रमण गरेपछि क्षेत्रीय सुरक्षा अवस्थाप्रति अन्तर्राष्ट्रिय चिन्ता बढेको छ।
गत जुलाईदेखि हुथी समूहका आक्रमण निरन्तर बढ्दै गएको बताइएको छ। लामो समयदेखि कायम युद्धविराम अन्त्य भएपछि यमनको द्वन्द्व पुनः चर्किएको छ। पछिल्लो तनाव मध्यपूर्वमा जारी व्यापक द्वन्द्वसँग समेत जोडिँदै गएको छ।
संयुक्त राष्ट्रसंघ सुरक्षा परिषद्ले यसअघि साउदी अरबमाथि बढ्दो हुथी आक्रमणको निन्दा गर्दै सर्वसाधारण, महिला तथा बालबालिका घाइते भएको जनाएको थियो।
साउदी नेतृत्वको गठबन्धनका प्रवक्ताका अनुसार शनिबार हवाई प्रतिरक्षा प्रणालीले रियादतर्फ प्रहार गरिएका दुई ड्रोन पहिचान गरी नष्ट गरेको थियो। त्यसैगरी, दक्षिणपश्चिमी सहर खमिस मुशैततर्फ प्रहार गरिएका दुई ब्यालेस्टिक क्षेप्यास्त्र पनि रोकिएको गठबन्धनले जनाएको छ। खमिस मुशैतमा महत्वपूर्ण हवाई सैनिक अड्डा रहेको छ।
हुथी राजनीतिक ब्युरोका सदस्य हेजाम अल–असदले आफ्नो समूहको सैन्य अभियान अझ ठूलो द्वन्द्वका लागि तयारीको एउटा चरण भएको बताएका छन्। उनले भने, “अभियानको शक्ति, दायरा र प्रभावका बाबजुद हाम्रो सशस्त्र बलले यसलाई पूर्ण स्तरको युद्धका लागि एउटा सानो अभ्यासका रूपमा मात्र हेरेको छ।”
हुथी समूहले साउदी अरबमाथि समुद्री नाकाबन्दीसमेत लगाएको दाबी गरिएको छ। समूहले तेल बोकेका पानीजहाजमाथि आक्रमण गर्नुका साथै यमनको लाल सागर तटीय क्षेत्रमा आफ्नो नियन्त्रण विस्तार गरेको र साउदी भूमितर्फ क्षेप्यास्त्र प्रहार गर्दै आएको बताइएको छ। यस्ता गतिविधिले क्षेत्रीय सुरक्षाका साथै ऊर्जा बजारमा समेत असर पार्ने चिन्ता बढेको छ।
खाडी सहयोग परिषद्का महासचिव जासेम मोहम्मद अल्बुदाइवीले हुथी आक्रमणको निन्दा गर्दै यस्ता गतिविधि साउदी अरबको सार्वभौमसत्तामाथिको गम्भीर उल्लंघन भएको बताएका छन्। उनले आक्रमण रोक्न तथा हुथी समूहलाई जवाफदेही बनाउन अन्तर्राष्ट्रिय समुदायलाई दृढ कदम चाल्न आग्रह गरेका छन्।
यसैबीच, यमनको शासकीय निकायका प्रमुख रशाद अल-अलिमीले शुक्रबार हुथी आक्रमणको सामना गर्न देशभर आम परिचालनको आह्वान गरेका छन्।
हुथी सेनाले यमनी सरकारी सेनाविरुद्ध सञ्चालन गरिरहेको स्थल अभियानका कारण मानवीय संकट थप गहिरिने जोखिम रहेको बताइएको छ। संयुक्त राष्ट्रसंघका अनुसार अगस्टदेखि हालसम्म यमनमा एक लाख ३८ हजार मानिस विस्थापित भएका छन्, जसमा करिब ७० हजार बालबालिका रहेका छन्।