वासिङ्टन डीसी । अमेरिकाको ओहायो राज्यस्थित एक प्रमुख ट्रक कारखानामा भएको ठूलो कर्मचारी कटौतीबाट करिब १४ हजार कामदार प्रभावित भएका छन्। यसले स्थानीय श्रमिक समुदाय र उनीहरूका परिवारमा आर्थिक चिन्ता बढाएको छ।
दक्षिणपश्चिमी ओहायोमा रहेको पूर्व नाभिस्टार ट्रक कारखानामा भएको कर्मचारी कटौतीले डेटन क्षेत्रको रोजगारी र स्थानीय अर्थतन्त्रमा असर पारेको छ।
रोजगारी गुमाउनेमध्ये ३० वर्षीय काइल बोस पनि छन्। उनका दुई छोरी छन् भने आगामी जनवरीमा तेस्रो सन्तान जन्मिने तयारीमा छ। खाद्यान्नलगायत दैनिक उपभोग्य वस्तुको मूल्य बढिरहेका बेला रोजगारीसमेत गुमेपछि परिवारको खर्च व्यवस्थापन गर्न कठिन भइरहेको उनले बताएका छन्।
बोसले यसअघि लगातार तीन पटक डोनाल्ड ट्रम्पलाई मतदान गरेका थिए। तर पछिल्लो आर्थिक अवस्था र रोजगारीको संकटबाट निराश बनेपछि आफूले राजनीतिक परिवर्तन आवश्यक देखेको उनले बताएका छन्।
आगामी नोभेम्बरमा हुने निर्वाचनलाई लक्षित गर्दै उनी डेमोक्र्याटिक पार्टीका पक्षमा मतदातासँग सम्पर्क बढाउने अभियानमा सहभागी हुने तयारीमा छन्।
यसैबीच, ट्रम्पले पनि यही क्षेत्रमा चुनावी सभा गर्ने कार्यक्रम रहेको छ। श्रमिक वर्गको ठूलो जनसंख्या रहेको यस क्षेत्रमा उनीहरूको समर्थन निर्वाचनका लागि महत्वपूर्ण मानिन्छ।
कुनै समय उद्योग र रोजगारीको प्रमुख केन्द्रका रूपमा परिचित डेटन क्षेत्रमा पछिल्लो समय रोजगारीका अवसर घट्नु र महँगी बढ्नुले स्थानीय परिवारमाथि आर्थिक दबाब बढाएको छ।