मिथिलाञ्चलमा सामाचकेवा पर्व सुरु, पूर्णिमासम्म मनाइने

मिथिलाञ्चलमा सामाचकेवा पर्व सुरु, पूर्णिमासम्म मनाइने

मटिहानी, महोत्तरी । मिथिलाञ्चलको प्रसिद्ध सांस्कृतिक पर्व सामाचकेवा आज रातिदेखि उत्साहपूर्वक सुरु भएको छ । दाजुभाइ तथा दिदीबहिनीबीचको प्रेम, आत्मीयता र अटुट सम्बन्धको प्रतीकका रूपमा यो पर्व मनाइँदै आएको छ ।

मिथिला क्षेत्रमा परापूर्वकालदेखि निरन्तर मनाइँदै आएको यस पर्वमा सतभैया, सामा, चकेवा, माली र चुगला लगायतका रंगीचंगी माटाका मूर्ति बनाउने परम्परा छ । बाँसका डालामा ती मूर्तिहरू सजाएर परम्परागत सामाचकेवा गीत गाउँदै पर्व मनाउने गरिन्छ ।

पर्वका अवसरमा दिदीबहिनीहरूले घरआँगनमा माटोको चौका बनाई विभिन्न आकृतिका मूर्तिहरू सजाउँछन् । उनीहरू सामाचकेवाका गीत गाउँदै नाचगान गर्छन् र दाजुभाइको दीर्घायु, सुख तथा समृद्धिको कामना गर्छन् ।

धार्मिक कथनअनुसार, भगवान् श्रीकृष्णकी छोरी सामामाथि अन्याय भएपछि उनका दाजु श्रीकृष्णले न्याय दिलाएको स्मरणमा यो पर्व मनाउने परम्परा सुरु भएको मानिन्छ । त्यसैले सामाचकेवा पर्व दाजुभाइ तथा दिदीबहिनीबीचको प्रेम, विश्वास र एकताको प्रतीकका रूपमा स्थापित भएको छ ।

आजदेखि सुरु भएको सामाचकेवा पर्व आगामी पूर्णिमासम्म मनाइने परम्परा छ । पूर्णिमाको राति दिदीबहिनीहरूले सामाचकेवाका मूर्ति तथा अन्य सामग्री विसर्जन गरी पर्वको समापन गर्ने चलन छ

लिङ्क सफलतापूर्वक कापि गरियो!